२०८२ असार २४ र श्रावण १४ गते आएको अकस्मात बाढीले रसुवा जिल्लाको गल्छी–त्रिशुली–स्याफ्रुवेशी–रसुवागढी सडक खण्डमा ठूलो क्षति पुर्याएपछि अवरुद्ध भएको सडक आंशिक रूपमा सञ्चालनमा आएको छ।
बिज्ञापन
बाढी र पहिरोले गल्छी–त्रिशुली–मैलुङ खण्डमा करिब १०० मिटर, मैलुङ–स्याफ्रुवेशी खण्डमा ७०० मिटर र स्याफ्रुवेशी–रसुवागढी खण्डमा १८ स्थानमा करिब १७०० मिटर सडक क्षति पुगेको थियो।
बिज्ञापन
विभागीय मेशिन र उपकरणमार्फत कटान भएको क्षेत्रमा नयाँ ट्रयाक खोल्ने काम तीव्र गतिमा भइरहेको छ। यद्यपि कठिन भूगोल र निरन्तर वर्षाका कारण कार्य चुनौतीपूर्ण रहेको विभागले जनाएको छ।
भाद्र ५ गतेदेखि खाल्टे क्षेत्रमा ढुंगाभराई गरी एकतर्फी यातायात सञ्चालन भएको छ। स्याफ्रुवेशी–रसुवागढी सडक खण्डमा करिब १३ किलोमिटर सडक पूर्ववत् सञ्चालनमा आएको छ। टिमुरे–रसुवागढी (मितेरी पुल) खण्डमा दुई स्थानमा करिब १५० मिटर सडकमा नयाँ ट्रयाक बनाउने कार्य जारी छ।
बिज्ञापन
यससँगै, रसुवागढी नाकामा निर्माणाधीन मितेरी पुलका लागि चीनतर्फ बेलीब्रिज जडान तथा जग निर्माणको काम भइरहेको छ। तर नेपालतर्फ बेलीब्रिजको जग निर्माण अझै सुरु हुन सकेको छैन।
विभागका महानिर्देशक विजय जैसीका अनुसार अझै करिब १० दिनभित्र सम्पूर्ण सडक यातायात पूर्ण रूपमा सञ्चालनमा आउने अपेक्षा गरिएको छ। विभाग निरन्तर कटान रोक्ने र सडक पुनः सञ्चालनमा ल्याउने प्रयासमा जुटिरहेको जनाएको छ।
